Frans Boermans († 11-03-1999) behuurt tot d'n toep van de Limburgse dichters en schrievers.Volges um stelde zien werk niks veur en waar van meining det hae meus oppasse um neet van gruuetsigheid naeve zien schoon te loupe as um ier woort toegezweid. Det zag hae in idder geval beej de toekinning van de Jo Hansenpries in 1997.
Frans Boermans

Laeveswins

Maar beej diezelfde gelaegenheid goof hae, d’n draak met zichzelf staekend, aan det hae d’r euver naodach "um net wie iddere VIP allewiels mien memoires in elf deile oèt te gaon gaeve, maar gennen oètgaever wilt aan de oètgave wat oètgaeve waeges de hoeëge oètgave". De wörkelikheid waas, det Frans Boermans, ofschoeën Stichting Henric van Veldeke um heejveur mierdere kiere euver aansprook, zien eige werke neet belangriek genóg vónd um ze anders dan as leed of revue-productie te publicere.

Cato

Van d’n andere kant leet hae noeëts nao um,lieënend beej de Romeinse schriever en politicus Cato, ziene laeveswins nao veure te bringe met de wäörd: "Euveriges bin ik van meining, det d’r in Venlo ’n klein Noord-Limburgs streektheaeterke mót kómme wao allein dialekstökker in waere gespeuld".

Wie Frans Boermans waas euverleje en zien literaire naolaotenschap door zien vrouw en kinder beschikbaar woort gesteld, waas d’n tied rièp um én zien werke veur de taegeswaordige en kómmende generaties toegankelik te make en beschikbaar te stelle én um nao te gaon of ziene hertenwins um ein volkstheater te realisere, asnog in vervölling kós waere gebrach.

't Theater van 't laeve

Ónder deze titel brach Dialekvereiniging Veldeke Venlo in 't jaor 2000 ein biografie oèt euver 't laeve en 't werk van Frans Boermans, geschreve door Adri Gorissen.

Stadsarchief

De hónderde tekste die Frans Boermans haet geschreve zien door de Veldeke gearchiveerd, en bewaard in 't Venlose stadsarchief.

Iereprieze:

1971 Limburgse CultuurpriesFrans Boermans en burgemeester van Graafeiland
1978 Brónze Eindaagsvleeg
1984 Venlonaer van 't Jaor
1989 Ierepenning van de gemeinte
1997 Jo Hansenpries
1999 Venlonaer van de ieuw