De redaksie van de website in gesprek met Frans Pollux april 2006

Dich schriefs ein revue, maks twieë cd's vol mit leedjes, dich traejs op, haes ein baan beej L1 Radio veer daag in de waek, schnabbels in de aovendore d'r behuurlik op los, as stadsdichter ( * )plek se ouk nog gedichte op laege winkelpande, en noow gaon we kieke nao dien letste werk Nova Venlo. Wao haol se de tied vandaan?
Frans Pollux
Door alles hiel strak te planne, netjes in miene heerlik gestructureerde agenda te schrieve, mich altied netjes aan aafspraoke te halde, noeëts te laat te kómme, mien waek zoeë in te deile det iddere daag zien eige kleur haet en veural door ouk good 'nae' te kinne zegge.
Maar effe serieus, ik heb genne agenda, ik vergaet de helf van alle aafspraoke die ik maak en ik doon allein maar dinger die ik leuk vindt. Dus heb ik ouk maar zelde 't geveul det ik 't te drök heb. Dao beej wissel ik volle waeke aaf met laege waeke en haet mien vriendin Maud erg vuuel begrip veur wat ik doon. Weekendjes Gent, flesse wien, en ós 3-zitsbank doon de res.

Maar ik kin mich veurstelle det ‘t waal ins op is met de ideje en de tekste. Mos se neet wat zuniger zien met dien talente? Duis se neet te vuuel op dit ougenblik?

Hiel aaf en toe vraog ik mich det aaf. Maar ik heb neet 't geveul det de kraan wao ik oèt tap minder dröppelt. Ik doon auk dinger wao beej ik oèt verschillende kraenkes mót tappe. Ein vastelaovesleedje schrieve vereis andere inspiratiebrónne en andere maniere van werke dat ein popleedje veur Neet oèt Lottum schrieve. En ein revue schrieve beteikent neet det ik dao naeve neet nog ein verhaol veur 't volkstheater kin probere te schrieve. Dao beej doon ik 't allemaol neet allein. De revue same met Wiel, 't volkstheater onder auspiciën van Cees Rullens, beej Neet oèt Lottum ( ** )heb ik d'r einen ganse band beej, en beej vastelaovesleedjes luustert Maud met ein half oeër mei. Stadsdichter bin ik in mien vreeje eurkes. 't Einige probleem is det de dinger die ik doon de merkwaardige neiging hebbe um waat deadline betref allemaol in ein korte tiedspanne te valle. Zoe mót ik dees waek ach tekste veur Neet oèt Lottum-leedjes aafhebbe (want we zitte in de studio), ein oètgeschreve verhaol veur ós theateroptraeje met de band, ein nieje versie van Nova Venlo, twieë leedjes veur de Ruiverse revue, ein leedje veur de pliesie Limburg-Noord. En dao beej kómme dan nog twieë nieje projekte wao ik mei bezig bin; ein "kefeej chantant" en ein waordebook.
Versrpeid euver de tièd is det allemaol prima te doon en juus hartstikke leuk - allein deadlines zitte mich waal ens in de waeg.

Wae duit dan de kwaliteitsbewaking ?

Ik gaon d'r van oèt det ik 't zelf doon. En dao beej hech ik aan commentare van minse oèt mien umgaeving. Beste kammeräöj, producer, Maud, Tom D. Maar ik gaef toe det ik aaf en toe door al 't oètstelle wies 't letste moment en dan toch d'n deadline wille haole, iets oètkump waovan ik achteraaf dink: det had baeter gekind. Det Binneste Boeteleedje in Velde is ein veurbeeld dao van.

‘t Liek d'r op det idderein noow gebroèk wil make van dien talente, bis se neet bang det dalik de Frans-Pollux-hype euver is en ze dich neet mier zeen staon?

Ein bietje. Maar van d'n andere kant haop ik det ‘t gauw euver is. Ik zoel niks lever doon as ein jaor lank zónder gezeik aan de kop ein book te schrieve. Of zoeë iets. En dao kóm ik neet aan toe umdet ik veur allerlei keitoffe dinger gevraog waer. 't Is ouk zoeë det ik dink det ik noow alles mót pakke waat ik pakke kin, want as ik euver ein jäörke of twieë weer 'oèt' bin, heb ik det in idder geval gedaon.
Euveriges is dit gen valse bescheidenheid: ik bin euvertuug genóg van bepaolde talente beej michzelf det ik dink det ik ouk zónder de FP-hype moeëje dinger kin make.

( * ) Vanaaf 't jaor 2007 is Frans neet mièr Stadsdichter.
( ** ) Vanaaf 26 juni 2009 besteit de band neet mièr.