Taal: Nederlands Taal: Venloos (aktief)

Beej ós in de Floddergats (2013)

Eigelik is ‘t 'n sträötje van niks die Floddergats.

'n Sträötje zoeë naevebeej wao se flot efkes daorhaer löps as se genne umwaeg wils make.
Dich haes dao ouk niks te zeuke in die duustere gats. Behalve neteurlik as se verleef bis en óngemerk stiekum dien schatje wils kösse.  De minse die d’r woeëne det zien gewoeëne minse. Minse wie geej en ik. Minse die eur dageliks kosje beejein mótte schravele en eur kinder groeët mótte bringe.

’t Is 1932, ’t is crisis en ’t laeve is zwaor.

As se nog werk haes, dan haes se gelök. Bis se werkeloos, dan mós se stempele en op 'n höltje biète. Zelfs de kastelein verköp laevesmiddele um de kop baove water te halde. Die rot crisis drief de minse oètein. De buurvrouw wao se ’t altièd zoeë good mei kós vinde krieg ’t noow hoeëg in eure bol umdet eure man waal werk haet en dae van dich neet. Naobers die beej mekaar de deur plat lepe kieke zich noow neet mièr aan. Zelfs de kinder, die dao ech niks aan kinne doon zien daovan de dupe. As de jónge d’r ouk nog tösse oèt gaon zien hielemaol de póppe aan ’t danse.

't Zoeë röstige sträötje is 'n probleemstraot gewaore.

Zeker noow d’r sinds kort 'n vrouw van twièfelechtig rippetatie is kómme woeëne. Waat mót die van os manne? ’t Gezellige kefee “De Klep” is lang neet zoeë gezellig mièr. In plaats det d’r aan de täöfelkes um 'n rundje wuurt getoep, wuurt d’r noow um de mach gestreje. ”Wae is de keuning van de Floddergats” det vruuëg zich ouk ’t Akkermansgilde aaf. As de stried al te hoeëg oplöp mót ’t gezach optraeje en det velt Gorreju neet mei. Of zal de geistelikheid weer vrede stichte in det achteraaf sträötje?

Volkstheater Frans Boermans brink de Floddergats tot laeve. 't Keizersträötje, zoeë as de Floddergats ouk waal wuurt geneump, haet ziene naam te danke aan Keizer Napoleon en is veur de Venlonaer nog altièd van bizondere beteikenis. De meiste Venlonaere kinne die gats as ‘t vrejerssträötje. Det d’r oeëts minse hebbe gewoeënd weite ze neet. Vanaaf noow is de Floddergats mièr as 'n vluchroete veur bange keizers en verleefde paartjes. Vanaaf noow kint de Floddergats zien eige verhaol, 'n verhaol van leefde en verdreet. 'n verhaol van hard werke en feeste, 'n verhaol van stried en duustere zaakjes. 'n Verhaol um neet mièr te vergaete.